ଡିବି ଛୋଟିଆ ଶବ୍ଦଟିଏ ମାତ୍ର ଏହାର ଅନେକ ଅର୍ଥ । ଵିଭିନ୍ନ ଅଞ୍ଚଳରେ ଏ ଶବ୍ଦର ଭିନ୍ନ ଭିନ୍ନ ଅର୍ଥରେ ଵ୍ୟଵହାର ରହିଛି । ସାଧାରଣତଃ କିରାସିନି ତେଲ ଜଳିଵାର ଧାତୁମୟ ପ୍ରଦୀପକୁ ଡିବି କୁହାଯାଏ ଏଵଂ ଏହା ତତ୍ସମ ଦୀପ ସହିତ ସମଦ୍ଧୃତ ।
ସେହିପରି ଡିବିଆ ଶବ୍ଦ ଭଳି ଡିବି ଶବ୍ଦଟି ଆମ ଭାଷାରେ ଡବା ଅର୍ଥରେ ମଧ୍ୟ ପ୍ରଚଳିତ ଥିଵା ପୂର୍ଣ୍ଣଚନ୍ଦ୍ର ଭାଷାକୋଷର ଉଲ୍ଲେଖରୁ ଜଣାଯାଏ । ଓଡ଼ିଶାର ଗଡ଼ଜାତ ଅଞ୍ଚଳରେ ଛୋଟ ମାଟିହାଣ୍ଡିକୁ ଡିବି କୁହାଯାଏ ।
କେତେକ ଅଞ୍ଚଳରେ ସକାଳଓଳି ଶ୍ରମିକମାନେ ଵା କୃଷକମାନେ ବିଲରେ ଖାଉଥିଵା ବାସିପଖାଳକୁ ଡିବିଭାତ କୁହାଯାଏ । ସେହିପରି କଳାହାଣ୍ଡି ଜିଲ୍ଲାରେ ସକାଳ ଜଳଖିଆ ସମୟରେ ଶିଶୁମାନଙ୍କୁ ଛୋଟ ପାତ୍ରରେ ଖୁଆ ଯାଉଥିଵା ସଜଭାତକୁ ଡିବିଖିଆ କୁହାଯାଇଥାଏ ।
କିନ୍ତୁ ଅନୁଗୋଳ ଜିଲ୍ଲାରେ ଡିବି ଶବ୍ଦ ସହ ଦେଵା କ୍ରିୟା ଯୁକ୍ତ ହୋଇ ଯେଉଁ ଡିବିଦେଵା କ୍ରିୟାଶବ୍ଦ ଵ୍ୟଵହାର ହୁଏ ତାହାର ଅର୍ଥ ଫୋଡ଼ିଦେଵା ଅଟେ ।
ଡିବି ଶବ୍ଦକୁ ଦ୍ଵିତକରି ଡିବିଡିବି ଲେଖିଲେ ମଧ୍ୟ ତାହାର ଅର୍ଥ ଆମ ଭାଷାରେ ଭିନ୍ନ ହୋଇଥାଏ । ନାଗରା, ଡମ୍ବରୁ ବାଜିବାର ଶବ୍ଦ, ଡିଣ୍ଡିମ ଶବ୍ଦକୁ ଡିବିଡିବି କୁହାଯାଏ ସେହିପରି ଚାରିତ୍ରିକ ଅପପ୍ରଚାର ଵା ଦୋଷଗୁଣ ପ୍ରଚାର ହେଵା, ଦୁର୍ନାମ ପ୍ରଚାରିତ ହେଵାକୁ ଆମ ଭାଷାରେ ଡିବିଡିବି ହେଵା କହିଥାନ୍ତି ।
No comments:
Post a Comment