Copsychus saularis ଵା The oriental
Magpie robin ପକ୍ଷୀକୁ ଊଣା ଅଧିକେ ସମସ୍ତେ ଦେଖିଥିଵେ । ଓଡ଼ିଶାରେ ଅଞ୍ଚଳ ଭେଦରେ ଏ ପକ୍ଷୀକୁ ଦଇଆଳ,ଦଇୟାଳ, ଦହିଆଳ, ଦୟାଳ ଓ ଦୟାଳୁ ଇତ୍ୟାଦି କୁହାଯାଏ ।
ଏମାନେ ୧୯ ସେଣ୍ଟିମିଟର ପର୍ଯ୍ୟନ୍ତ ଲମ୍ବ ହୁଅନ୍ତି । ଗୋଡ଼ ଲମ୍ବ; ଲାଙ୍ଗୁଡ଼ ଓ ପକ୍ଷର ଲମ୍ବ ସମାନ। ଦଇଆଳର ପୁଚ୍ଛ, ପକ୍ଷ ଓ ମୁଣ୍ଡ କଳା; ପେଟ ଧଳା ।
ଭୋରରୁ ଏ ପକ୍ଷୀ ସରୁସ୍ବରରେ ସିଟୀ ମାରେ । ଦଇଆଳ ପକ୍ଷୀ ମାଟି ଉପରେ ଦୌଡ଼ିଲା ବେଳେ ଲାଙ୍ଗୁଡ଼ ଟେକିଥାଏ । ଏହି ସ୍ତ୍ରୀ ପକ୍ଷୀ ଧୂମ୍ର ଵର୍ଣ୍ଣର ହୋଇଥାଏ ।
ଏହାର ପେଟ ଦଧିପରି ଶୁକ୍ଳ ଥିଵାରୁ ଏ ପକ୍ଷୀର ଦଇଆଳ ନାମ ହୋଇଥିଵା ପୂର୍ଣ୍ଣଚନ୍ଦ୍ର ଭାଷାକୋଷରେ ଉଲ୍ଲେଖ ରହିଛି ।
ଭାରତର କେତେକ ଭାଷାରେ ଦଇଆଳ ପକ୍ଷୀର ନାମ ନିମ୍ନରେ ପ୍ରଦତ୍ତ ହେଲା...
●ନେପାଳୀ―ଧୋବିନୀ ଚରା
●ବଙ୍ଗାଳୀ―ଦୋୟଳ
●ଅହମିଆ―ଦହିକତରା
●ଗୁଜରାଟୀ ― ଦୈୟଡ଼
●ପଞ୍ଜାବୀ―ଧିଆଲ
●ମଲୟାଲମ―ମଣ୍ଣାତ୍ତିପ୍ପୁଳ୍ଳ୍କ୍,ମନ୍ନାତ୍ତୀକିଲୀ
●ତାମିଳ―ଵଣ୍ଣାତ୍ତିକ୍କୁରୁଵି
●କନ୍ନଡ଼―ମଡି଼ଵାଳ
●ମରାଠୀ―ଦୟାଳ
ଦଇଆଳ ପକ୍ଷୀ ନିଜର ମଧୁର ସ୍ଵନ ଯୋଗୁଁ ଜଣାଶୁଣା । ଅନେକ ପକ୍ଷୀ ମାତ୍ର ଏକ ପ୍ରକାରର ଧ୍ଵନି ରାଵକରନ୍ତି କିନ୍ତୁ ଦଇଆଳ ପକ୍ଷୀ ଅନେକ ପ୍ରକାରର ରାଵ କରିଥାଏ । ବାଙ୍ଗ୍ଲାଦେଶରେ ଦଇଆଳ ପକ୍ଷୀକୁ ଜାତୀୟ ପକ୍ଷୀର ମାନ୍ଯତା ମିଳିଛି ।
ଆପଣଙ୍କ ଅଞ୍ଚଳରେ ଏ ପକ୍ଷୀକୁ କ'ଣ କୁହନ୍ତି ? ଆପଣଙ୍କ ଅଞ୍ଚଳରେ ଏ ପକ୍ଷୀ ଦେଖାଯାଏ କି ?
