କରୋନା ଵିଷୟରେ ଏଇକଥା ଜାଣିଛନ୍ତି କି ?

ଚୀନଦେଶରୁ ସାରା ଵିଶ୍ଵକୁ ସଂକ୍ରମଣ ହୋଇଥିଵା କରୋନା ଵିଷାଣୁ ଵିଷୟରେ ଵିଗତ ଏକମାସ ହେଵ ଵିଭିନ୍ନ ଗଣମାଧ୍ୟମରେ ସମ୍ବାଦ ସବୁ ପ୍ରଚାର ହେଉଅଛି । ଏହି ରୋଗ ଵିଷୟରେ କେତେକ ଗୁଜଵ ମଧ୍ୟ ପ୍ରଚାରିତ ହେଉଛି ।

ଇତି ମଧ୍ୟରେ କିଛିଲୋକଙ୍କ ମଧ୍ୟରେ ଗୋଟିଏ ଭ୍ରମଧାରଣା ବସା ବାନ୍ଧିଲାଣି ଯେ କରୋନା ଶବ୍ଦଟି କୁଆଡ଼େ ଚୀନ ଦେଶୀୟ ଭାଷାରୁ ନିଆଯାଇଛି କାରଣ ରୋଗଟା ପ୍ରଥମେ ଚୀନରୁ ଚାରିଆଡ଼େ ଵ୍ଯାପିଥିଲା । ତେଵେ ସତ୍ଯ ହେଲା corona  ଶବ୍ଦଟି ଚୀନଦେଶର ମାଣ୍ଡାରିନ୍ ଭାଷାରୁ କି ଅନ୍ୟ କୌଣସି ଏସୀୟ ଭାଷାରୁ ଆସିନାହିଁ ଵରଂ ଏହି ମୂଳତଃ ଲାଟିନ୍ ଭାଷାର ଏଵଂ corōna ଶବ୍ଦକୁ ନିଆଯାଇ ଇଂରାଜୀ ଭାଷାରେ corona ଭାଵେ ଵ୍ଯଵହାର ହେଵା ଆରମ୍ଭ ହୋଇଅଛି । 

କରୋନା ନାମକରଣ ସାଧାରଣ ଲୋକେ କରିନାହାନ୍ତି ଵରଂ ଏହା ଵିଷୟରେ ଅଧ୍ଯୟନ କରୁଥିଵା ଵୈଜ୍ଞାନିକମାନେ ହିଁ ଏହି ନାମକରଣ କରିଅଛନ୍ତି । 

corona ଶବ୍ଦର ଆକ୍ଷରିକ ଅର୍ଥ
“ସୂର୍ଯ୍ୟ ଚାରିପଟେ ଆଲୋକର ମୁକୁଟ ପରି ଵୃତ୍ତ” ଅଟେ ଏଵଂ ପ୍ରାଚୀନ ଲାଟିନ୍ ଭାଷାରେ corōna ଶବ୍ଦର ଅର୍ଥ ଥିଲା
୧)garland(ଫୁଲହାର ଵା ମାଳା)
୨)wreath(ମାଳା,ଗଜରା,ପୁଷ୍ପାଞ୍ଜଳି)
୩)crown(ମୁକୁଟ;ସାଧାରଣତଃ ୟୁରୋପୀୟ ରାଜାମାନଙ୍କ ମୁକୁଟ)

ଲାଟିନ୍ corōna ଶବ୍ଦଟି ପ୍ରାଚୀନ ଗ୍ରୀକ୍ ଭାଷାରେ ପ୍ରଚଳିତ κορώνη (korṓnē) ର ସାହିତ୍ଯିକ ରୂପ ଅଟେ । ଗ୍ରୀକ୍ ଭାଷାରେ κορώνη (korṓnē) ଶବ୍ଦର ଅର୍ଥ ଥିଲା ...

୧)କୌଣସି ଵକ୍ର ଵସ୍ତୁ
୨)ଅନ୍ତ
୩)ବିନ୍ଦୁ
୪)କୌଣସି ବୋଇତର ଵକ୍ର ପୃଷ୍ଠଭାଗ
୫)ତେରଛା

ସେହିପରି ଇଂରାଜୀ corona, ଲାଟିନ୍ corōna ଓ ଗ୍ରୀକ୍ κορώνηର ମୂଳ ପ୍ରାକ୍ ଭାରୋପୀୟ ମୂଳଧାତୁ ରୂପ *(s)ker ଅଟେ ।

κορώνη ଶବ୍ଦ ଅନ୍ୟ  ଏକ ଦିଗରୁ ଇଂରାଜୀକୁ ଯାଇ crown ମଧ୍ୟ ହୋଇଅଛି ଯାହାର ସାଧାରଣ ଅର୍ଥ ମୁକୁଟ ଅଟଇ ।

ତେଵେ ଆଧୁନିକ ଭାଷାଵିଦମାନେ ଏହି *(s)ker
P.I.E. ଧାତୁ ଶବ୍ଦର “to bend(ଵକ୍ର ହେଵା), turn(ବୁଲିଵା) ଇତ୍ୟାଦି ଅର୍ଥ ନିର୍ଣ୍ଣୟ କରିଅଛନ୍ତି । 

ସଂସ୍କୃତରେ ମଧ୍ୟ ପ୍ରାକ୍ ଭାରୋପୀୟ ଧାତୁରୂପ  *(s)ker ସହିତ ସାମଞ୍ଜସ୍ୟ ଥିଵା କିଛି କ୍ରିୟାଶବ୍ଦ ରହିଛି ଯଥା
●କୁଟ୍ ଧାତୁ(ଵକ୍ରହେବା)
●କୁଚ୍ ଧାତୁ(ଵକ୍ରହେବା)
●କ୍ରୁଞ୍ଚ୍ ଧାତୁ(ଵକ୍ର ହେଵା)
ଇତ୍ୟାଦି...

ତେଵେ ଏଠାରେ ଆମ ମନରେ ସ୍ଵତଃ ପ୍ରଶ୍ନ ଆସେ  ଚୀନଦେଶରୁ ଚାରିଆଡ଼େ ଵ୍ଯାପିଥିଵା ଏହି ଵିଷାଣୁକୁ corona କାହିଁକି କୁହାଗଲା ?

ପ୍ରକୃତରେ କରୋନା ଵିଷାଣୁ'ର ଆକାର ଆଧାରରେ ହିଁ ଏହାର ଏଭଳି ନାମକରଣ କରାଯାଇଛି । ଇଂରାଜୀ ଭାଷାକୁ corona ଶବ୍ଦଟି ଲାଟିନ୍ ଭାଷାରୁ ନିଆଯାଇଛି । ମୂଳ ଲାଟିନ୍ ଶବ୍ଦ corōnaର
ମୁଖ୍ୟ ଅର୍ଥ ଫୁଲମାଳା ଓ ମୁକୁଟ ଥିଲା ଏଵଂ  ପରେ ପ୍ରାଚୀନ ଲାଟିନ୍ ଭାଷାରେ ପ୍ରଚଳିତ corōna ଶବ୍ଦର crown ଵା ମୁକୁଟ ଅର୍ଥଟି ମୁଖ୍ଯତଃ ଵିଶିଷ୍ଠତା ଲାଭକରି ଇଂରାଜୀରେ corona ହୋଇଣ ଚଳିଵା ଆରମ୍ଭ ହୋଇଛି ।

କରୋନା ଵିଷାଣୁର ଆକାର ସାଧାରଣତଃ ୟୁରୋପୀୟ ଶାସକଙ୍କ ମୁକୁଟ ଭଳି ହେଵା ହେତୁ ଏହାର ଏଭଳି ନାମକରଣ ହୋଇଥିଵା ଏହି ଶବ୍ଦର ନିରୁକ୍ତି ଵିଶ୍ଲେଷଣରୁ ଜଣାପଡ଼ଥାଏ ।

ତେଵେ କେଵଳ କରୋନା ହିଁ ନୁହେଁ ଵିଶ୍ଵରେ ଗତ ଦୁଇ ଦଶନ୍ଧି ମଧ୍ୟରେ ଅନେକ ଵିଷାଣୁ ସଂକ୍ରମଣ ହୋଇଅଛି  ଯେମିତିକି...

୧) ଆନ୍ଥ୍ରାକ୍ସ୍(୨୦୦୧),
୨)ୱେଷ୍ଟ୍ ନାଇଲ୍ ଵାଇରସ୍(୨୦୦୨)
୩)ସାର୍ସ୍(୨୦୦୩)
୪)ବର୍ଡ୍ ଫ୍ଲୁ(୨୦୦୫)
୫)ଇକୋଲି(୨୦୦୬)
୬)ସ୍ଵାଇନ୍ ଫ୍ଲୁ(୨୦୦୯)
୭)ଇବୋଲା(୨୦୧୪)
୮)ଜି଼କା(୨୦୧୬)
୯)ନିପାହ୍ (୨୦୧୮)

ପ୍ରୋକ୍ତ ସମସ୍ତ ଵିଷାଣୁ ଯୋଗୁଁ  ଏଵେ ବି ଅନେକ ଦେଶରେ ବହେ ଲୋକ ମୃତ୍ୟୁ ମୁଖରେ ପଡୁ଼ଅଛନ୍ତି । ପ୍ରକୃତରେ କରୋନା ଗୋଟାଏ ଵିଷାଣୁ ଜାତୀୟ ଅଣୁଜୀଵ ସମୂହର ନାମ ଏଵଂ ଚୀନରେ ଵ୍ଯାପିଥିଵା କରୋନା ଵିଷାଣୁକୁ “ବୁହାନ-କରୋନା ଵିଷାଣୁ" କୁହାଯାଏ ।   ଵିଶ୍ଵ ସ୍ଵାସ୍ଥ୍ୟ ସଂଗଠନ(WHO) ଏହାର ନାମ ରଖିଛି COVID-19
।

ଏହା ପୂର୍ଵରୁ ବି ମଧ୍ଯପ୍ରାଚ୍ଯରେ କରୋନା ଵିଷାଣୁ ସମୂହର ଏକ ଜାତୀୟ ଅଣୁଜୀଵ ଯୋଗୁଁ ବହୁଲୋକ ରୋଗଗ୍ରସ୍ତ ହୋଇଥିଲେ ଯାହାକୁ ପ୍ରଥମେ “novel corona virus 2012” କୁହାଯାଉଥିଲା ଓ ଵର୍ତ୍ତମାନ ଏହାକୁ “ମଧ୍ୟପ୍ରାଚ୍ୟ ରେସପିରେଟରି ସିଣ୍ଡ୍ରୋମ ଵାୟରସ୍” (MERS-CoV) କୁହାଯାଉଛି ।

କରୋନା ଏକ ଆର୍.ଏନ୍.ଏ. ଜାତୀୟ ଵିଷାଣୁ ଯେହେତୁ ଏହାର ଅନୁବଂଶିକ ଗୁଣସୂତ୍ରର ନିର୍ମାଣ ଆର୍. ଏନ୍. ଏ. ନାଭିକୀୟ ଅମ୍ଳ ଦ୍ଵାରା ହୋଇଅଛି ।
କରୋନା ଛଡ଼ା ଇବୋଲା,
ସାର୍ସ୍,ରେବୀଜ଼୍,ଇନଫ୍ଲୁ଼ଏଞ୍ଜା,ହେପାଟାଇଟିସ୍ ସୀ,ହେପାଟାଇଟିସ୍ ଇ ଓ  ପୋଲିଓ ଇତ୍ୟାଦି ଵିଷାଣୁ ଗୁଡ଼ିକ ଆର୍. ଏନ୍. ଏ. ଵିଷାଣୁ ଶ୍ରେଣୀର ଅଟନ୍ତି ।